རྒྱལ་བ་ཀུན་གྱི་ཡེ་ཤེས་གཅིག་བསྡུས་སྐུ།།
སྲིད་དུ་བཟུང་བ་འཇམ་དབྱངས་རྣམ་རྒྱལ་ཞེས།།
མཚན་དོན་མཉམ་པའི་དམ་པ་བཀའ་དྲིན་ཅན།།
མཁས་དབང་འཇམ་དབྱངས་རྣམ་རྒྱལ་ཁྱོད་ཉིད་རྒྱལ།།
ཁྱེད་ཀྱི་དྲུང་ན་ལོ་མང་རྟག་འགྲུས་ཀྱིས།།
རིག་གཞུང་དོན་དུ་གཉེར་བའི་མང་ཐོས་དག།
དྲི་བསུང་རླུང་གིས་བསྐྱོད་པའི་སྨན་ལྗོངས་བཞིན།།
བསེར་བུས་བསྐུལ་བའི་མཛད་བཟང་ཆ་ཙམ་བརྗོད།།
ཁྱོད་ཉིད་ཡེ་ནས་མཁྱེན་པའི་དཔལ་ལྡན་པས།།
ཤེས་པར་བྱ་བའི་ཤེས་བྱ་མི་སྲིད་མོད།།
འོན་ཏེ་འགྲོ་བའི་བསམ་པ་དང་མཐུན་པར།།
ཤེས་བྱའི་གནས་ལ་སྦྱངས་པའི་ཕུལ་དུ་ཕྱིན།།
གཞོན་ནུའི་དུས་ནས་ཆོས་ཀྱི་འཕྲོ་སད་དེ།།
ཅི་ཞིག་ཚོལ་བའི་འདུན་པ་དྲག་ཏུ་འཁྲུངས།།
མཁྱེན་རབ་དབང་ཕྱུག་སྡེ་གཞུང་དང་མཇལ་ཚེ།།
འདུན་མ་འགྲུབ་པའི་ཉམས་ཀྱིས་ཞབས་པད་བསྟེན།།
གང་གི་གསུང་ལས་ཁ་བ་རི་པ་ཡི།།
ཉམས་གུད་གྱུར་པའི་གསུང་རབ་ཇི་སྙེད་ཀུན།།
མྱུར་སྐྱོབས་བྱོས་ཞེས་སྐུལ་མ་མཛད་མ་ཉིད།།
བཀའ་གསུང་ཅི་བཞིན་སྒྲུབ་པའི་དམ་བཅའ་མཛད།།
ཐུགས་བསྐྱེད་རྨད་དུ་བྱུང་བའི་མ་ཕམ་ལས།།
ལེགས་འཁྲུངས་གཙུག་ལག་ཡལ་འདབ་བྱེ་བ་ཅན།།
སྤེལ་དང་འཛིན་པའི་སྙིང་སྟོབས་གོ་ཆ་ཡིས།།
གྲིབ་བསིལ་གཅིག་གིས་ས་ཀུན་བསིལ་བར་བྱས།།
ཕྱི་ཡི་ཤེས་བྱས་ཁྱེད་ཉིད་རབ་རུ་ཕྱུག
ནང་གི་ཤེས་བྱས་ཁྱོད་ཉིད་རབ་ཏུ་བརྗིད།།
གསང་བའི་ཡོནཏན་གསང་བ་བསམ་མི་ཁྱབ།།
ཁྱོད་ཉིད་འདི་ནས་བྲལ་བར་ཡིད་གདུང་ཆེ།།
ཁྱེད་ཀྱིས་བདག་ལ་ཕ་བཞིན་ལྟོ་གོས་སྩལ།།
དགེ་བའི་བཤེས་བཞིན་རིག་པའི་ལམ་དུ་བཙུད།།
བློས་ཐུབ་གྲོགས་བཞིན་སྐྱོན་ཡོན་སྦ་གསང་མེད།།
ཁྱོད་ཉིད་འདི་ནས་བྲལ་བར་ལྷག་པར་སྐྱོ།།
མུ་འཐུད་འགོད་རྒྱུ།